السبت، أبريل 28، 2007

تجربة القرود الخمسة

أحضر باحث خمسة قرود، وضعها في قفص!

وعلّـق في منتصف القفص حُزمة موز، وضع تحتها سُلّماً. بعد مدة قصيرة
وجد أن قرداً ما من المجموعة اعتلي السُّلم محاولاً الوصول إلى الموز.

ما أن وضع يده على الموز، حتى أطلق الباحث رشاشاً من الماء البارد على القردة الأربعة الباقين

وأرعبهم!! بعد قليل حاول قرد آخر أن يعتلي نفس السُّلم ليصل إلى الموز...

كرِّرالباحث نفس العملية ، رُش القردة الباقين بالماء البارد. كرِّر العملية أكثر من مرة!

للننظر إلى تتابع تجربته من خلال تسجيله التجربة وملاحظاته
بعد فترة وجدنا أنه ما أن يُحاول أي قرد أن يعتلي السُّلم للوصول إلى الموز ستمنعه المجموعة

خوفاً من الماء البارد.

الآن

سنبعد الماء البارد، ونخرج قرداً من الخمسة إلى خارج القفص، ونضع مكانه قرداً جديداً

لنسميه سعدان لم يُعاصر ولم يُشاهد رَش الماء البارد. سرعان ما

سيذهب سعدان إلى السُّلم لقطف الموز، حينها ستهب مجموعة القردة المرعوبة من الماء البارد

لمنعه وستهاجمه. بعد أكثر من محاولة سيتعلم سعدان أنه إن حاول قطف الموز سينال

عَلْـقَة ً قِردَانيّة من باقي أفراد المجموعة !

الآن سنخرج قرداً آخر ممن عاصروا حوادث رش الماء البارد غير القرد سعدان

وندخل قرداً جديداً عوضاً عنه. ستجد أن نفس المشهد السابق سيتكرر من جديد.

القرد الجديد يذهب إلى الموز، والقردة الباقية تنهال عليه ضرباً لمنعه، بما فيهم سعدان على

الرغم من أنه لم يُعاصِر رش الماء، ولا يدري لماذا ضربوه في السابق، كل ما هناك

أنه تعلم أن لمس الموز يعني عَلْـقَة على يد المجموعة. لذلك

ستجده يُشارك، رُبما بحماس أكثر من غيره بكَيل اللّكمات والصفعات للقرد الجديد ..

ربما تعويضاً عن حُرقَة قلبه حين ضربوه هو أيضاً


سنستمر بتكرار نفس الموضوع، ونخرج قرداً ممن عاصروا حوادث رش الماء، ونضع قرداً جديداً،

وسيتكرر نفس الموقف. سنكرر هذا الأمر إلى أن تستبدل كل المجموعة القديمة ممن تعرضوا

لرش الماء بقرود جديدة!

في النهاية .
.
سنجد أن القردة ستستمر تنهال ضرباً على كُل من يجرُؤ على الاقتراب من السُّلم.

لماذا؟؟؟؟

لا أحد منهم يدري!!!!!

لكن هذا ما وَجدَت المجموعة نفسها عليه منذ أن جاءت !

هذه القصة ليست على سبيل الدُّعابة

... وإنما هي من دروس علم تطوير الذات الحديثة

لينظر كُل واحد منكم إلى محيطه

عمله

بيته

. كَم من الإجراءات المُطبقة، تُطبّق بنفس الطريقة وبنفس الأسلوب

البيروقراطي غير المُقنِع منذ الأزل، ولا يجرؤ أحد على السؤال لماذا يا تُرى تُطبق بهذه

الطريقة؟ بل سيجد أن الكثير ممن يعملون معه وعلى الرغم من أنهم لايعلمون سبب تطبيقها

بهذه الطريقة يستميتون في الدفاع عنها وإبقائها على حالها

( منقول)

يعني إيه فرح؟؟؟

يعني إيه فرح؟؟!!!!!!!

طبعا معروف

فرح يعني فرح

و سعادة و سرور

و غبطة و حبور

و انبساط و انشراح

و زأططة و انشكاح

و فرفشة و دردشة

و زيطة و زمبليطة

و دلع و أغاني و حب و أماني

و رقص و تنطيط و فرقعة

و ضحك و هزار و طرقعة

و صهللة و جلجلة

و أكل و شرب و بغددة

و ..

# فيه إيه يا عم الكئيب؟ بتبص لي كدا ليه؟ مش عاجبك؟

= ليه؟ هو انت بتقول حاجة غلط لا سمح الله!!! دا إنت كلامك كله حكم

# أمال بتبص لي كدا ليه و مش متفاعل معايا زي ما أكون أنا في وادي المجانين و انت في وادي العاقلين؟؟؟

= و الله عايز أعرف هو إيه الهدف أصلا من الزواج؟

# آااااه... عايز يقلبها حصة فلسفة!!! يا بني حاول تتمتع بالحياة زي ما هي و كفاية تعقيد بقى حرام عليكو....

= طب بلاش ... سؤال تاني: ينفع الواحد يعمل أفراح و ليالي ملاح من غير ما يعصي ربنا؟ و يا سلام كمان لو ينفع يعملها و هو بياخد ثواب...ينفع؟

# قصدك إيه؟ يا عم إنت بتكبر المواضيع ليه؟

= يعني ربنا ما يرضاش باللي بيحصل في الأفراح اليومين دول

# إيه يعني اللي بيحصل؟ بيحصل كل خير طبعا يا كئيب

= يعني عاجبك مثلا اختلاط الرجالة بالستات بالطريقة دي.. تقارب شديد و فتنة لا شك فيها لأن الناس طبيعي جاية فرح و بالتالي كله جاي على سنجة عشرة.. يرضي ربنا بقى هذا الكم الهائل من النظر المحرم؟

# طب خلينا نفترض حسن النية يا أخي .. مش كل الناس شياطين .. حرام عليك

= لو افترضنا دا نبقى بنضحك على نفسنا – و بعدين كون الناس بتبص دا مش معناه إنهم شياطين بالعكس – دا معناه إنهم بني آدمين عاديين – لأن اللي يتحط في موقـف فتنة صعب زي دا غصب عنه هيبص – لكن ربك العليم شرع لنا دين عظيم يحمينا

# ..........!!!!!!!!!!!!!

= و بعدين في حالة الاختلاط و البيئة الغير ملتزمة تلاقي النساء و الرجال على حد سواء يبدأوا يرقصوا- الداهية الأولى إن الرجالة في الزمن دا و يا للعار ... بيرقصوا، و كفى بها مصيبة – و الداهية التانية إن النساء ما بقاش عندها حياء ... فبيرقصوا قدام الرجالة من غير مشاكل- مع إنهم ممكن يرقصوا و ينبسطوا و يهيصوا لوحدهم بعيدا عن الرجال – لكن الشيطان يزين للناس المنكر – لو انت ترضى إن أختك ترقص قدام الرجالة تـ...

# اخرس قطع لسانك من لغلوغه! قلة حيا صحيح...إ...إ...إنت...إنت... إزاي تتجرأ و تقول كدا قدامي يا مجرم!!!!!!!!!!!!!!!

لا يسلم الشــــرف الرفيـع مـن الأذى حـتـى يـراق عـلى جـوانـبه الـدم

= و كذلك الناس –الشرفاء العقلاء- لا يرضونه لأخواتهم

# خلاص خلاص فضها سيرة... حرقت دمي الله يسامحك .أوووف

= بلاش دا كله و قل لى إيه بقى رأيك في الخمر و السجاير و خلافه؟

# الخمر حرام و السجاير .... مش عارف، و خلافه برضه شكلها كدا حاجة حرام

= و حتى السجاير يا حدق حرام أكيد – طب إيه رأيك في فرح يبقى فيه شرب محرمات و لو من بعض الناس؟

# طبعا حاجة مش ظريفة خالص – يعني هو دا وقت شرب؟

= كل الناس اللي هتبقى قاعدة و لو حتى مش بتشرب حرام – مشتركين في الذنب – طب دا يبقى فرح دا بربك؟!! – اللي كل الناس فيه قاعدين ياخدوا في ذنوب من ساعة ما دخلوا؟ هو الفرح دا مش المفروض إنه حاجة حلوة و جميلة؟

# معلوووم

= العروسة بقى: تبقى متزوقة أو من غير حجاب و قاعدة قدام مخاليق ربنا يتفرجوا عليها، و جوزها الحمش: قاعد راخر جنبها، الناس بتتفرج عليهم... و هو عينه تقع على الستات المتزوقة راحين جايين

# حيلك حيلك .يا عم انت رحت فين...مش للدرجة دي يا سيدي..الناس برضه عندها شوية ذوق مش هيبحلقوا في العرسان...و الأهل فرحانيين بيهم و الناس جاية تهنيهم...احنا في ايه و لا في ايه؟ و الراجل لسه متجوز طازة مش هيبص بصة وحشة أبدا..اتق الله يا شيخ

= اللهم إنا نسألك الهدى و التقى و العفاف و الغنى – اللهم اكفنا بحلالك عن حرامك و بطاعتك عن معصيتك

# يعني عايز الستات ياخدوا العروسة و الرجالة ياخدوا العريس زي ما نكون في ميتم، و لا كأنهم متجوزين على سنة الله و رسوله؟؟؟؟!!!!

= صلى الله عليه و سلم –" و الله و رسوله أحق أن يرضوه إن كانوا مؤمنين"، يعني نكتب صيغة عقد الزواج على سنة الله و رسوله و نعمل فرح على سنة الكفار و زي ما بيعملوا نعمل بالضبط؟؟؟؟؟؟؟؟؟ طب يا أخي و الله العظيم إحنا ممكن نعمل أفراح زي الفل و آآآآآآخر ألسطة و تبقى على سنة الله و رسوله – مش يبقى أحسن؟

# إيدي على كتفك – حد يكره؟

= نجيب فرقة بنات إسلامية للستات في قاعة منفصلة تماما و فرقة شباب إسلامية و معاهم كام راجل شيخ سكرة (عشان يقولوا كلمة حلوة ظريفة مفيدة) في قاعة للرجال منفصلة تماما – و المهم عدم إزعاج السكان بالأصوات الصاخبة و لا بالكلكسات – بيب بيب ...بب بب بيييييب

بيب بيب ...بب بب بيييييب

بيب بيب ...بب بب بيييييب

و كمان نجيب أكل و شربات و شكولاطة أو حلويات شرقية و غربية او أي حركات – بس برضه من غير إسراف و لا تبذير

و ندعو للوليمة دي كل الحبايب، و الأهل و القرايب، و كمان الناس الغلابة المحترمين اللي نعرفهم من المنطقة أو العمل ...– ما ينفعش الناس اللي أصلا شبعانة هي بس اللي تفرح و تاكل!!

و كمان العريس و العروسة يبقوا يصلوا المغرب و العشاء جمع تقديم أو تأخير (مع إنه فيه خلاف في جواز ذلك - و الأحسن يبقى كل فرض بفرضه - يعني الفرح يبقى بعد صلاة المغرب مثلا) عشان ما ياخدوش ذنب ترك الصلاة أو تأخيرها

و المعازيم كمان يحرصوا ما تفوتهومش صلاة

و الحفلة نفسها ما تتأخرش كتير عشان الناس كلها و أهل العروسين و العروسين يقدروا يصلوا الصبح حاضر

و اللي يحضر وليمة الفرح لازم يدعو بخير لصاحبها (اللهم اغفر لهم وارحمهم وبارك لهم فيما رزقتهم) (أكل طعامكم الأبرار وصلّت عليكم الملائكة وأفطر عندكم الصائمون) ويدعو للزوجين (اللهم بارك فيهما وبارك لهما في أبنائهما) (بارك الله لك وبارك عليك وجمع بينكما في خير)

# طب بس بالراحة علي شوية ... ما تاخدنيش في دوكة... نعمل إيه في الأغاني و الـديجي D.J.؟

= إذا كان فيه ضرب دف أو غناء فيكون بما أحل الله وبكلمات طيبة لا تثير غريزة ولا تؤذي مشاعر: فيحرم إقامة حفلات للغناء الماجن – زي كل الأغاني اللي في السوق – يغني فيها الفساق الذين لا يعرفون لله حرمة و لا يراعون أدبا و لا خلقا و ليس عندهم دين – و تغني فيها نساء يظهر أثر الابتذال و العري و الانحلال و الإباحية في غنائهن و لباسهن و حركاتهن، و حفلات الموسيقى الصاخبة.

فالغناء الجائز في هذه الليلة هو ما لا يحرك الشهوات، و لا يستثير النزوات، و لا يصف العورات، و يا حبذا لو كمان يبقى غناء يحث على مكارم الأخلاق و بناء بيت مسلم و يمدح أخلاق المسلمين و شريعتهم...و برضه هيبقى دمه خفيف و كله مشاعر جميلة و راقية.

والدف في هذه الليلة يكاد الفقهاء يجمعون على جوازه، وبعضهم يجعله مستحبا، وما عدا الدف من آلات الموسيقى محل خلاف بين أهل العلم إلا الموسيقى التي تجعل الناس في حالة من الهياج والغياب فهذه لا خلاف في منعها. و فرق حفلات الغناء الإسلامية تلتزم إلى حد بعيد بضوابط الغناء، أما الفرق العادية فلا تخلو من مخالفة شرعية.

# بس دي ليلة واحدة و هي فرحة العمر و الناس اتعودت على حاجات كتير من اللي مش عاجباك دي... أهي ليلة و تعدي...

= لازم المسلم المعتز بدينه يحسم الأمر أمام الأهل، وإذا كان الناس قد اعتادوا أن يقوموا بمخالفات في مثل هذه المناسبات والتبرير لذلك بأنها ليلة في العمر وأن الفتاة لن تخطب كل يوم وأنها لن تتزوج كل يوم إلى آخر هذه الذرائع الفاسدة والحجج الواهية التي نتجرأ بها على حرمات الله ونبارز الله فيها بالمعاصي، فالإسلام من كل هذا بريء، وما أحوج الغيورين على دينهم أن يظهروا أخلاق الإسلام في مثل هذه المناسبات وفي غيرها وأن يرى الناس كيف تكون أفراحنا عبادة وطاعة لله عز وجل ويباركها الله من فوق سبع سماوات.

وإذا الناس ما شافتش مننا الترجمة العملية لأخلاق الإسلام وتعاليمه في مثل هذا المناسبات فمتى إذن؟!
يا جماعة: لا خير في أمر يبدأ بمعصية الله عز وجل وإذا كان إصرارك على عدم إقامة حفلة فيها مخالفات شرعية أمر يثير الغرابة والإنكار فدا شيء مافيهوش مشاكل فقد أخبر رسول الله –صلى الله عليه وسلم- عن هذا الواقع المرير الذي نعيشه فقال –صلى الله عليه وسلم- "بدأ الإسلام غريباً وسيعود كما بدأ فطوبى للغرباء" رواه مسلم وغيره.

# طيب أنا اقتنعت باللي فات كله يا سيدي – طب العروسة بقى مش من حقها تتزوق؟

= طبعا – لكن بالمعروف: يعني ما ينفعش تتجاوز العروس في زينتها حتى لو مش هيشوفها حد غير زوجها زي نمص الحاجبين، والتفليج بين الأسنان، و وصل الشعر.
و كمان وضع المرأة للمونيكير يمنعها من الوضوء؛ لأن الوضوء لا يصح مع هذه الموانع.
و المصيبة الكبيرة و الداهية الفظيعة ذهاب العروسة إلى (الكوافير) إذا كان رجلا، أو امرأة نصرانية، ويجب الاكتفاء بمصففة الشعر المسلمة.

و يا ريت نمنع خروج العريس بزوجته في المدينة للتنزه في حالة إن هي بملابس زينتها التي تظهر مفاتنها وعورتها.

و نمنع خلع العروس حجابها ليلة الزفاف: و هو حرام ما دام هناك أجنبى، فلم يرد الشرع ولم يقل أحد من العلماء باستثناء هذه المناسبة، ولا يجوز أن نطوِّع الدين لهذا السلوك الوافد علينا ممن لا يدينون بالإسلام، فقد كانت العروس تظهر بكامل زينتها فى الماضى البعيد والقريب ما دام المحتفلون بها هم النساء والأقارب المحارم كالأب والأخ والعم والخال، وذلك بمعزل عن الرجال الأجانب.

و الأصل في الاحتفال الإسلامي بالأعراس ضرب الدفوف والغناء، واللهو البريء الخالي من المجون والخلاعة والميوعة وفحش القول، و يجوز للمرأة أن تجلس في الكوشة بكامل زينتها بشرط ألا يراها الرجال الأجانب، وألا يدخل زوجها عليها فيطلع هو على النساء الأجانب.
# طيب و التصوير؟؟؟

= حلو قوي جيت في وقتك – و ابتديت تفهمني يا جميل – أيوة كدا ربنا يفتح عليك...

بعد كل اللي قلناه دا ما ينفعش نجيب راجل غريب لـتصوير العروسين إذا كانت العروسة متزوقة و مظهرة لزينتها، أو كانت مبينة أكثر من وجهها وكفيها.
و بالتالي ما نديش فيلم التصوير لراجل لتحميضه؛ لأنه بكدا يمكنه من الاطلاع على العورات، بحسن نية بقى.. بسوء نية... – إحنا ما عندناش ستات للفرجة.
طبعا هتقوللي أمال نديه لمين؟

هقول لك فيه استوديوهات تصوير قائم عليها ستات مسلمات ملتزمات ربنا يجزيهم عننا كل خير – أصلا عشان الغرض دا.

و ما لكش حجة – لأن كل الناس بقى عندها كاميرات رقمية (ديجيتال) و كاميرات فيديو شخصية – ممكن واحدة ست تقوم بالتصوير عند قاعة الستات.

# ماشي يا معلم – ماشي – ربنا يعيننا كدا و يهدينا للخير - ربنا يكرمك و أشوفك عريس و أفرح فيك.

= يا باشا إنت تؤمر – عايزني أتجوز إمتى؟

# لما تكـوم نفسك يا خويا،........ جزاك الله خيرا..

= و جزاكم – و لا تنسنا من دعائك الصالح.

الأربعاء، أبريل 18، 2007

مساحة مشتركة

السلام عليكم ورحمة الله وبركاته
الا اونا الا دونا
-لا مش هيا دي-
طم ترم طمطم
-ده صوت طبلة-
أيها الناس
تم افتتاح
المدونة الجديدة
وهي مدونة تهدف- من اسمها- لايجاد مساحة مشتركة بيننا
نحن مٌـتصفحو شبكة المعلومات
وكَــٌَـتاب المدونات
عن طريق كتابة موضوع بسيط حول
صفحات
أو كتاب
أو موضوع مفيد
قرأها أي منا
وذلك لنشر وتبادل الثقافة
الاشتراك فيها مفتوح
اللي عايز يبعت
الي
أو
وياريت نبذة بسيطة عن تخصص دراسته أو معلوماته
أو يرد هنا
وانا ابعتله دعوة
شكرا يا شباب
والسلام عليكم ورحمة الله وبركاته

الخميس، أبريل 12، 2007

شاكيرا.....شاكيرا

في حلقة القاهرة اليوم بالأمس الناس كلها بتتصل عشان تشتكي ياعيني انهم دفعوا 750 أو 450 عشان يحضروا حفلة الست -شاكيرا طبعا- ولم يصلوا ولم مشيوا مابين5 الي 6 كيلومترات علي الارجل وفي الظلام الدامس حتي يصلوا الي الحفل ولم يتمكنوا من ذلك

ولي عدة ملحوظات

الاولي : ان في ناس مش مقدرة مشاكل البلد الاقتصادية والاجتماعية ورايحين يدفعوا 750 جنيه أو 450 جنيه من اجل ان يشاهدوا او يحضروا حفل لمغنية وكلام فارغ ولا يعلمون ان آلافا من الشعب لا يجد قوت يومه وآلافا اخري يحتاجون أدوية في الشهر ب 450 جنيه وليست باستطاعتهم ان يتمكنوا من شراءها وها هم الابطال المغاوير يذهبون بصحبة اهليهم واصحابهم ودفعتهم الي حفلة -والتي لم يحضروها -بمبالغ تعمل عمليات القلب المفتوح لمرضي مصر كلهم بدون انتظار وتخلص مستشفي الاطفال للاورام ،دول كانوا 30 الف شخص يعني علي اقل تقدير 20 مليون جنيه ادفعت في ليلة واحدة عشان حضور حفلة لسماع أغاني

الثانية : اننا مازلنا رغم المبالغ المدفوعة والهيصة -قطاع خاص اهو - وكل ده لم نستطيع ان ننظم مكان يتسع ل 30 ألف شخص

الثالثة : لم جه منظم الحفلة عشان يشوف شكاوي الناس ومش عارف ايه قعد يقول انه الزبون علي حق وكلام التثبيت ده كله لكن في الاخر احنا بعتذر وبنتأسف وان شاء الله في الحفلات القادمة التنظيم هيبقي وهيكون ودي بقي كارثة فين جمعيات حماية المستهلك ولو حتي في حاجة تافهة زي دي المفروض ان الراجل دي يدفع تعويض لهؤلاء الاخوة ويحجزلهم كراسي مكيفة في حفلة حكيم الجاية ويجبلهم عصير جريب فروت

الموضوع الجاي عن المزيكا ان شاء الله

ولا حول ولا وقوة الا بالله

ملحوظة مهمة : انضم الي فريق المدونة أخي الحبيب كارلوس