الاثنين، أكتوبر 30، 2006

الـــــبــدايـــــــة

اكيد أي حد هيجي هنا هيقولي انت ليه سميتها الاسم ده؟
هقوله علطول خبط لزق ملكشي دعوة مهو مش كل من هب ودب يجي يسأل هنا........ ليه هيا سايبة؟"أثر اعلانات التلفزيون"
المهم لكن طبعا لو اخواننا وحبايبنا بتوع المكاتب المظلمة- قصدي شبة المظلمة-يوووووة قصدي المنورة باصحابها طبعا استضافوني وقدمولي واجب الضيافة اللي طبعا هيظهر علي كل ملامحي حتي علي صوتي -آآآآآآآآآآه يارقبتي-
المهم وسألني البيه ال؟؟؟ط وقال سمتها كدة ليه يلا ؟
طبعا هيبقي نفسي اقوله وانت مال ؟؟؟؟! بس مش هاقول عشان انا مؤدب-عدوها خلوها مؤدب-
بس طبعا مش هينفع بل علي العكس يحث السؤال رد الفعل العكسي عندي
وارد بدون تردد :يابيه أصل الحواديت دي كانوا بيحكوهالنا واحنا صغيرين عشان يضحكوا بيها علينا وينيمونا بس دلوقتي واحنا كبار بيضحكوا بيها علينا برضه بس واحنا صاحيين وفايقين وزي الفل
هيرد البيه ال؟؟؟ط وهو يزم شفتيه امتعاضا"مش عارف امتعاضا دي جت ازاي المهم" ويقولي : طب والباقي ياروح ؟؟؟؟.
مازال الرد العكسي متولي القيادة: يابيه اصل الخزعبلات دي بتخرج من أصحاب العقل التالف- اللاسع يعني -اللي محدش ياخد عليه مهو لو اتاخد علي كلامه هيسافر بالسلامة
والحركات بقي يابيه دي حركة لا ارادية للي عنده صرع واحنا بعون الله كلنا عندنا صرع...............الشعب كله عنده جنان وصرع واللي بيعقل منهم بيمسك البلد
وعشان الحاجات دي كلها يابيه مش موجودة في اي حتة اولم يبتلي بها اي حد تاني فعشان كدة اسمها مصريااااااااااا.......آآآآآآآآآآآآآآآآآآآآآآآآآي
ملحقتش اكمل الكلمة ولقيت صوت أجش وأيد اكثر اجششاشا "معرفشي مصدرها ايه الكلمة دي عشان محدش يسال"
الصوت بيقول: خدوووووووووووووووووووووه
والايد بتقول كلام بيوجع
المهم كفاية البداية دي
لحسن نروح
المراجيييييييييييييييييييييييييييييييح