مصروفات نثريه للجمعيه الخيريه

السلام عليكم و رحمة الله و بركاته لمّا حضرتك بتكون متطوع في عمل الخير طبيعي جداً ان حد يتصل بيك في يوم من الأيام و يعرض عليك حاله محتاجه عمليه عاجله ب150 الف جنيه و من الطبيعي برده ان حضرتك تبتدي تعرض الأمر على العديد من الجمعيات الخيريه و المجموعات و اهل الخير من خلال النت و التليفزيون و الردايو و الجرايد و كل وسيلة متاحه و ساعتها رد فعل الناس بينقسم لقسمين قسم متحمس قوى و بيعس بكل طاقته و لو حتى جمّع 10000 جنيه بيكون شايف انها مجرّد نقطه في بحر و قسم تاني محبط بيبص على ال10 جنيه في ايده و يستبعد المشوار و يقول هو يعني المبلغ بتاعي ده حيعمل ايه لكن برده عشان حضرتك متطوع في عمل الخير فمن الطبيعي انك تتلقى مكالمه تلفونيه من احد الأسر التى تساعدها في علاج او تعليم و متأكد منها و تثق فيها لتستغيث بك هذه الأسرة و تقول لك الأم مثلاً ارجوك تلحقني يا باشمهندس معنديش فلوس اجيب بيها اكل للعيال النهارده لو تقدر تساعدني بأى حاجه لو 20 جنيه و انا ممكن اجي لك في اى مكان و لو حضرتك رجل او شاب تقدم خدمات خيريه في منطقة سكنك بيكون عنوان بيتك محفوظ عادة للأسر المحيطه بيك و ممكن جداً تلاقي الساعه 12 مساءً ام شايله طفلها الرضيع على ايدها و حرارته 40 و بيتقول لك الحقني مطلوب له شريط دواء ب5 جنيه بس و ممعييش و طبعاً سهل انك تحدد موعد مع الأم الأولى اللى محتاجه 20 جنيه و تديها 50 كمان مش عشرين بس و في الحاله التانيه الموضوع اسهل و اسهل ايه يعني 5 جنيه تسحبهم من محفظتك و تديهم لها ان شالله حتى لو مش معاك ممكن تاخدها لأقرب صديليه بتتعامل معاها و بيثقوا فيك و تشرح لهم الموقف فيعطوعها الدواء على ما تتصرّف بس المشكله الحقيقه هو كام مرة لازم تعمل ده في الشهر و عشان اكون اكثر وضوحاً خلوني اسأل السؤال بطريقه تانيه و هو يا ترى انا و غيري من المتطوعين في العمل الخيري نستطيع ان نخرّج من محافظنا 20 جنيه كام مرة في اليوم الواحد لمساعده العديد من الأسر التى نحتك بيها و نعايش مآسيها و لمدة كام سنه و طبعاً مش حينفع انزل خبر في الجرنال بقول فيه مطلوب 5 جنيه لمريضه و لا حقول لصاحب الحاجه الذي تتوقف حاجته على 10 جنيهات استنى لمّا اجمّع لك تبرعات من صحابي فوت عليذا بعد اسبوع في الوقت اللى بتوصل تجميع مطالبهم النثريه فيه الى اكثر من 10 الاف جنيه شهرياً حد يصدقها دي حكتب لكم امثله عمليه ام هبه من المعصرة بنتها كانت محتاجه لعمليه في الحجاب الحاجز من 3 شهور و كان متكفل بحالتها الشيخ حسنى من مسجد و جمعية هناك و الأستاذ سمير سعد كانوا بيجمعوا لها فلوس العمليه التى تكلفت حوالى 5 الاف جنيه و احنا ساعدناهم بمبلغ بسيط و تمت العمليه على خير بس بعد كده ام هبه احتاجت دواء للبنت ب71.50 جنيه في الأسبوع و لمدة شهرين و بعدين ربنا يكتب لها ان شاء الله الشفاء الكامل و متحتاجش للدواء ابداً و هي بتتصل بيذا كل اسبوع عشان نجيب لها الدواء ده و تاني حاله ام رشا من المرج وهي مريضه بامراض عديده منها السكر و فقر الدم و تتكفّل بحالتها جمعية امام الدعاة بالمرج و الأستاذ محمد هاشم بيعملوا لها راتب شهري 300 جنيه و ساعدوها في شنطة رمضان و دخول المدارس لكن ام رشا بتحتاج فجأه كل فترة كيس دم او كيسين و ثمن الكيس الواحد 110 جنيه في المستشفيات الحكوميه و ده اللى احنا متكفلين نوفره ليها من خلال الجمعيه عندنا و كمان بتاخد دواء في اليوم ب30 جنيه و برده كل ما الدنيا بتديق عليها و الجمعية بتاعة المرج مبتلاقيش تديها بتتصل بينا نشتري لها الدواء و بنشتريه ليها بنفسنا و امّ منى من امبابه بنتها منى مصابه بسرطان المخ و عملت عمليه و اهل الخير ساعدوها في العمليه و كانت لها نتائج سلبيه ادت ان البنت بتاخد دواء 375جنيه 3 مرات في الأسبوع و الأم لجأت للتأمين الصحي اللى بيدفه 200 و بيسيب عليها 175 كل اسبوع و برده بتحاول تجمعهم من اهل الخير على اد ما ربنا بيقدرها بس فجأه منه احتاجت آشعه ب400 جنيه على المخ و سالت اهل الخير محدش قدر يوفرها لها و الآشعه كانت لازم تتعمل وقتها تاني يوم على طول و احنا اللى وفرناها لها و غيرهم و غيرهم كتير من حالات مدونينها بأدق تفاصيلها في سجلاّت الجمعيه يا ريت بجد تهتموا تساعدونا من اجل هولاء ارقام الجمعيه / 24721722 -0122938551 عنوان الجمعيه / مدينة نصر - الحي الثامن - ش الطاقه - 85 مساكن التعاونيات - جمعية المقسطين الخيريه جزاكم الله خيراً

مشط فلاّيه و فرشاة اسنان و فوطه صغيرة

بسم الله الرحمن الرحيم *** مشط فلاّية و فرشاة اسنان و فوطه صغيرة *** السلام عليكم و رحمة الله و بركاته اكتب عندك يا سيدى :- ( عدد واحد مشط صغير + واحد فوطـــــة صغيرة + زجاجــــة برفان ( عطر) صغيرة + فرشاة اسنان صغيرة + انبوبة معجون صغيرة + صابونه صغيرة+ كيس شامبو صغير+ ليفه صغيرة ) يا ترى تقدروا تخمنوا الحاجات دي لمين لأ مش للأقزام السبعه دي شنطة مجموعة المنار الخيريه مش كفايه تقف حدود علاقتنا بيهم عند التصفح السريع لكراسة الرسم التى تحمل شخابيطهم الجميله و طرح السؤال الساذج التقليدي عليهم عايزين تبقوا ايه لمّا تكبروا عايزين نسمع صوت احلامهم عارف اد ايه ممتع انك و انت بتزور دار ايتام تروح للأطفال المحندقين بعد ما يخلصوا وجبة الغداء مثلاً و تاخدهم على الحمام و تغسل لهم ايديهم و وشوشهم الصغيرة بإيدك و بعد ما ينشفوا يفتحوا لك ايديهم الإتنين الصغنتطين عشان ترش لهم فيها شوية برفان و يشموها و يقولوا لك الله تانى تاني جرّبتي تعلميهم يغسلوا اسنانهم بالفرشاة و المعجون و بعد ما غسلتي اسنانك معاهم و لمستى اسنانهم الصغيرة برفق بفرشاة اسنان صغيرة بحجم افواههم الصغيرة عشان تعلميهم الطريقه الصحيحه لغسل الأسنان و بعدها حطيتي رغوة كبيرة من الصابون على فمك و قعدتي تطلع لهم منها فقاقيع قزحية اللون و تعلميهم إزاى يعملوها و سرقكم الوقت و انتوا بتلعبوا بالمايه و الصابون لغاية ما الصابون لسع شفايفكم و مع ذلك برده كنتوا فرحانين و بتلعبوا تعرفي انها حاجه لطيفه قوى انك تأكلى طفله من اسرة رقيقة الحال من الطبق بإيدك و انك تسرحي لها شعرها بنفسك و تعلميها تطبق الملابس و تحطها في الدولاب او في المكان المخصص لها لحفظ ملابسها إزاى تعرف !!؟؟ بديع قوى انك تقعد ساعه او ساعتين مع طفل معندوش اهل او عنده اهل بس معندهمش وعي كفايه و معندهمش كمان فلوس خالص عشان يقدروا يراعو اطفالهم كما يجب جرّبت تقعد مع طفل ليه الظروف دي وتتكلموامجرّد تتكلموا كلام جديد و مختلف وتتجاذبوا اطراف الحديث او تلعبوا ماتش كورة مع بعض او دور شطرنج و تحاول تنقل له في الوقت ده خبرتك المتواضعه في الحياة و تصلّح له شوية مفاهيم تصوروا اد ايه مهم نعرف انطباعاتهم عن الدين و السياسه و قضايا المجتمع و رأيهم في كل اللى بيشوفوه و بيسمعوه جرّبت او جرّبتى تكونوا ماما او بابا او حتى قدوة بجد لطفل يتيم مقيم بدار ايتام معندوش بابا او ماما يحبوه من قلوبهم حب أمين على مصلحته و نفسه يشوفه احسن الناس بدون افراط او تفريط زي ما بيحصل للأسف من الكثير من المشرفين في اغلب دور الأيتام التى تتأرجح اخطائها بين شدة القسوة و شدة التدليل و النتجيه دائماً هي الإفساد طيب جرّبت او جرّبتي تكونوا ماما او بابا او حتى قدوة بجد لأطفال عندهم بابا و ماما بس مسجلين اطفالهم في الجمعيات الخيريه عشان ما باليد حيلة و العين بصيرة و الإيد قصيرة .. و الأطفال كتير و الرزق قليل .. و انا راجل غلبان يا بيه و انا ست صحتى على ادي يا باشا احنا مبنشوفش امامنا من دوامة الحياة الصعبه اللى احنا فيها ..الخ الكلام زمان في الأفلام الأبيض و اسود كان عشان تعمل ده لازم تكون ابن الباشا و تاخد ابن الجنايني و تربيه في القصر .... الخ الفيلم العربي امّا في زماننا اللى بالألوان مع ظهور الجمعيات الأهليه و تعددها و اقبال الشباب عليها بقى الموضوع اسهل بكتير و من غير ما تضطر تكون ثري او عندك سكن كبير او تتوفر فيك الشروط لكفالة طفل ممكن قوى انك توصل للطفل ده في مكان معيشته في الجمعيه و تزوره كل شويه بس المشكلة اللى كانت بتؤرقني و تؤرق البعض طول الوقت هو ان اغلب الزيارات لدور الأيتام و الجمعيات دي حتى لو متكرره و منتظمه اللا اننا غصب عننا كنّا بنكتشف كل مرة ان زيارتنا بتتحول لمجرّد لحظات مرح ودعابه مع الأطفال و تصوير و توزيع حلويات وشوية بالونات و كارتون و الأراجوز في يوم اليتيم او في العيد و كنّا ما بنصدق و ده في حد ذاته كان شئ ليه اهميته بس احنا كنّا شغوفين للمزيد كان نفسنا نعيش مع الأطفال دول تفاصيل مختلفه لليوم عشان كده كنذا ما بنصدق نلاقي وسط الغالبيه دي تظهر من وقت للتاني ومضات امل جميله من خلال متطوعين في الخير كانوا بيوجهوا لنا الدعوة اننا نروح كمتطوعين لتدريس الكمبيتور مثلاً او الإشتراك في فصول محو الأميه مثلاً للتدريس او في فصول تقويه للأطفال اد ايه كانت تجارب ممتعه و ثريه عشان كده اسمحوا لى ادعوكم للإلتحاق بومضة امل جديده نفذتها سنة 2004 في دار انقاذ الطفوله للأيتام بجسر السويس وسنة 2006 في دار التربيه بالجيزه و ادعوكم اليوم في 2008 لننفذها سوياً في قرية عرب الترابين عايزين نكوّن فريق عمل من المتطوعين بالجهد او المال لدعم الفكرة و استمرارها على ان يكون المتطوعين بالجهد مستعدين لزيارة مرة كل اسبوع في يوم الجازه بتاعتنا من الشغل او الدراسه لعدد من الأطفال الأيتام و بسطاء الحال هناك في الجمعيه بتاعة القريه او في المدرسه و تنفيذ جدول عمل معاهم بس جدول العمل ده مش لتدريس مناهج المدرسه و لا لتحفيظ القرآن الكريم لأنهم ما شاء الله عندهم اللى بيقوم لهم بالمهمه دي خير قيام عننا احنا عايزين ندرّس لهم اخلاق و سلوكيات اتعلمناها بالفطرة من اهالينا او من المجتمع او من الأيام و نساعدهم يبنوا شخصيتهم و عقولهم مش كفايه نديهم فلوس يشتروا بيها اكل و لبس يا ريت بعد اذن حضراتكم الى تعجبه الفكرة و تكون عنده رغبه حقيقيه في الإشتراك معانا سواء بالجهد التطوعي او بالفلوس لشراء مكونات الشنطه المذكروة في بداية الرسالة او حتى بالتبرعات العينيه انه ميتأخرش في الخطوة دي عشان بنحلم نبتدي مع بداية شهر 11 ان شاء الله تليفونات الجمعيه 24721722 و 0122938551 العنوان / 85 مساكن التعاونيات الحي الثامن مدينة نصر جمعية المقسطين الخيريه و يا ريت طبعاً يكون 11/2008 لحسن لو مفيش فلوس و لا متطوعين ممكن يتأجل المشروع ل11/3050 و اللا حاجه و اللى عنده اى اقتراحات او تعديل للفكرة او ملاحظات يا ريت ميبخلش عليّا بيها انا محتاجه اتعلم منكم حاجات كتير عشان اصحح اخطائي تحياتى

حديقة الأزهر... جوهرة تشوبها الأتربة

السلام عليكم و أعتذر عن انشغالي عن المدونة لمدة طويلة ولكن لمستجدات من العمل-حيث ضغط العمل- والخطوبة وما يستتبعه من أشياء أخري ورمضان بما فيه من انشغال كبير عن الشبكة ولكن لاني قد قمت بزيارة مؤخرا الي حديقة الأزهر واليكم المعلومات الخاصة بالحديقة ثم ما رأيته ناقصا وان كمل فستصبح بالفعل مفخرة للمصريين .

1- معلومات عن الحديقة:-
تم إنشاء حديقة الأزهر على مساحة 30 هكتار، بواسطة إمام الطائفة الإسلامية الإسماعيلية كريم شاه الحسيني ( آغا خان الرابع )، بعد ان قرر اهداء حديقه إلى مدينة القاهرة في 1984، بناء على الاعتقاد الاسلامي-طبقا لمعتقده- بأننا جميعا مسؤولون عن إبداع الخالق ولذلك يجب ان نترك الارض مكانا أفضل، اتخذ هذا القرار اثناء مؤتمر 1984 "العاصمه الناميه: مواكبة نمو القاهرة المدني" تم تصميم المشروع المكلف 30 مليون دولار أمريكي،
وكان على العاملين في المشروع نزع تلال من تراكمات القمامة والحجارة التي تراكمت على مدار 500 عام، وأخفت تحتها سور المدينة الايوبية -بني في عهد صلاح الدين الأيوبي - الذي يعود للقرن الثاني عشر وقد وتطلب العثور عليه الحفر لعمق 15 مترا، ليظهر السور بأبراجه وشرفاته بكل روعتها. هذا إلى جانب العديد من الأحجار التي حملت كتابات هيروغليفية.

تتميز الحديقة بارتفاعها عما يحيط بها، بل أيضاً مدينة القاهرة الفاطمية القديمة بما تركته من آثار، التي تقع على الجانب الغربي من الحديقة وتمتد حتى الدرب الأحمر، بما تضمه من المساجد، والأضرحة، المزينة بخط طويل من المآذن، من بينها مسجد السلطان حسن وما يحيطه، والجامع الأزهر وجامع الحسين بالاضافة إلى قلعة صلاح الدين الأيوبي. فهو مشهد رائع للقاهرة التاريخية.

بمجرد اجتيازك بوابة الحديقة تستقبلك مساحات شاسعة من التلال الخضراء والبساتين المفتوحة لتنعم باستنشاق نسمات من الهواء العليل. وليبهرك تصميم الحديقة المرتبط بالتصاميم الاسلامية لتشعر بالتراث الإسلامي العريق في فترات تاريخية وأماكن جغرافية مختلفة بالعالم الإسلامي. فالنمط المعماري المصري الاسلامي المميز يطغى بوضوح على أماكن الجلوس والطرق وكذلك بعض مباني الحديقة مثل مطعم «الربوة»، بينما تلاحظ المظاهر الهندية في العناصر المائية من نوافير وأحواض وقنوات وشلالات وبحيرة مائية ضخمة تم تصميمها جميعاً على نسق مماثل لنوافير تاج محل في الهند، بينما يظهر النسق الفارسي بشدة في النخيل والزروع العامة التي تظلل أماكن الجلوس بالحديقة حتي أنك عند التعب يمكنك التقاط أنفاسك بالجلوس على «التختبوش» لتشعر وكأنك تحاكي حياة الملوك والسلاطين أما إذا استكملت رحلتك أعلى التلال الخضراء التي ترتفع عن سطح الأرض والمناطق الموجودة حولها لأكثر من 20 مترا، فإنك قد تقع في حيرة من أمرك بسبب جمال النباتات والورود التي تشبه حبات اللؤلؤ المتناثرة على أرض الحديقة، حيث توجد أشكال متعددة للحياة النباتية تتمثل في النباتات المتنوعة المصرية وغير المصرية التي جلبت من الخارج خصيصاً لتزيين الحديقة. أما إذا تجولت بناظريك من فوق هذه التلال خارج الحديقة التي تكسو الخضرة ثلثيها، بينما تمثل ممرات السير والمتنزهات والبحيرة الصناعية وجداول المياه والمطاعم والكافتيريات باقي المساحة، فسوف تشاهد منظرا بانوراميا فريدا يتمثل في المآذن الشاهقة والمباني التي تمتد فوق بساط تاريخي لتبدو أمامك أسوار قلعة صلاح الدين وقباب مسجد محمد علي.

التصميم الرئيسي للحديقة يعتمد على وجود المحور الرئيسي الذي يسمى «القصبة» التي تربط أطراف الحديقة من الشمال إلى الجنوب، وهو عبارة عن محور أساسي يبلغ عرضه ثمانية أمتار، تصطف على جانبيه عشرات من النخيل الملوكي الذي وزع على جانبيه العديد من المقاعد الجانبية التي يتوسطها ممرات وشلالات للمياه وطرق ضيقة تبدأ من شمال التل الى اتجاه القلعة في الجنوب، ثم ينحني المحور الأساسي في اتجاه مآذن المدينة القديمة مؤديا بعد ذلك إلى بحيرة صغيرة على الهضبة المنخفضة، والتي تمر على الحديقة الأساسية المقسمة إلى أجزاء مستقلة تزينها الحدائق والمقصورات التي تعتمد في تصميمها على التشكيلات الإسلامية القديمة، المحاطة ببساتين مزروعة، ليتجه بعدها المحور نحو المقهى المطل على البحيرة. ربما عليك الآن تناول الطعام، يوجد بالحديقة العديد من المطاعم إلا ان اشهرها مطعم «ستوديو مصر» الذي يهتم بتقديم الوجبات المصرية واللبنانية، بينما يهتم مطعم «البحيرة» بتقديم وجبات خليجية وإيطالية، فضلا عن مطعم القلعة الذي جرى تصميمه في اتساق رائع مع العمارة الاسلامية للمكان والذي يقدم الأطعمة الشرقية على أنغام الموسيقى العربية التي تنساب هادئة مع رائحة أوراق الشجر والورود من حولك لتنعم بسحر ليل القاهرة المحاط بنجوم لا تظهر إلا في سمائها، خاصة ان الحديقة تستقبل زوارها من التاسعة صباحا وحتى الثانية عشرة ليلا وتتسع لـ 15 ألف زائر يوميا.
وفي مسرح «الجنينة» بالحديقة يمكنك مشاهدة العروض المسرحية وربما يمكنك تناول أفضل المشروبات المصرية في المقهى الموجود بجانب البحيرة. أما إذا كنت من عشاق الآثار والأماكن السياحية فزيارتك لحديقة الأزهر تسعفك وتلبي رغباتك لأن الأحياء المجاورة للحديقة من أغنى مناطق العالم بآثار الفن والعمارة القديمة، فبخلاف رؤيتك لمآذن الجامع الأزهر، وجامع الحسين، وقلعة صلاح الدين، ومسجد محمد علي، ومسجد السلطان حسن، تستطيع الوصول من داخل الحديقة إلى سور المدينة الأيوبية، ومجموعة أم السلطان شعبان التي بنيت عام 1369 ميلادية وهي انعكاس رائع للعمارة والهندسة المملوكية القديمة، وكذلك مجموعة خاير بك التي تنسب لأول حاكم مصري بعد الغزو العثماني وتضم قصرا وجامعا وبعض الكتب.
2-ما يشوه هذا الجمال:-
*علي جمال وكل ما تحتويه الحديقة من خدمات وترفيه وتسهيل علي زوارها فلا يتوفر مصلي لأداء الصلوات ويضطر الزائرون المصلون للصلاة اما فرادي أو جماعات متناثرة وليست المشكلة الكبري بالنسبة للرجال ولكنها في النساء التي تضطر لاداء الصلاة في وسط الناس وهو شر ما أنزل اله به من سلطان.
* علي جمال وتصميم الحديقة والسور الأيوبي المحيط بالحديقة من الجهة الخلفية فان المساكن التي تجاوره تشوه منظر الحديقة

وما عرفته أن المشروع كان يستهدف تطوير المنطقة المحيطة الا ان الموقف الان هو وجود مثل هذه التحفة الفنية النادرة وسط أكوام من العشوائية التي كان المفروض أن تنتقل مع القمامة التي ازيحت من المنطقة لانشاء حديقة الأزهر.
*الموسيقي تعمل في كل الوقت فلو سعادتك اتهفيت في مخك وقلت تصلي هتصلي علي أنغام المزيكا -حاجة ولا أنكي من كدة-

* كالعادة وحين تري شيئا جميلا في هذا الوطن يتسارع الناس لتشويهه فتمتليء الحديقة بالمرضي العاطفيين وأصحاب الكبت النفسي فتجدهم في أركان الحديقة وهو ما يخدش حياء زوار الحديقة ورغم وجود أفراد من الحديقة منتشرين داخلها الا ان الموضوع منتشر وكأنهم كعادة المجتمع المصري تسوده عشوائيةغريبة تمحو أي أثر للمدنية والتحضر وتاريخ هذه الأمة .

*رغم ما يحتويه المشروع من امكانيات جميلة ورائعة الا ان الموقع الالكتروني الخاص بالحديقة لا يوازي هذه القيمة من حيث التصميم والمعلومات المتوافرة