الاثنين، نوفمبر 24، 2008

نــورت مــصــر

السلام عليكم
حد فيكم سمع الكلمتين دووول قبل كدة
هتسمعها في مكانين ملهموشي تالت
الأول الاعلانات اللي بتشجع السياح عشان يجوا مصر وخصوصا العرب لانه اعلان ناطق باللغة العربية والثاني لما بتكون مسافر ورجعت من السفر ودي بقي المفروض تبقي لوجه الله واليكم التفاصيل
كنت من يومين بستقبل قريبي في المطار وكان جاي من ألمانيا ونزل من الطيارة كالعادة ودخل الصالة ولأنه كان في تدريب تابع للشركة التي يعمل بها فقد أعطت له الشركة هدايا من الشركة للعملاء وهي ميداليات وأقلام وأغطية للرأس(كاب يعني) وما الي ذلك ولمحه أحد رجال الجوازات وفي يدة شنطة تحتوي علي الأغطية فقال تعال هنا وبابتسامة عريضة قاله نــورت مــصــر خدوه علي الأوضة الحمرا عشان يتفتش -وكأنه شك ان معاه مخدرات- وراح الأوضة الحمرا وراحوا فاتحين الشنطة الوحيدة اللي جاي بيها من بره فلقي عد من الشنط البلاستيك المطبوع عليها شعار نفس الشركة ولقي جواها نفس الأصناف وكلها مطبوع عليها كلها نفس اسم الشركة وراح الراجل مبرق وقاله كل دي هدايا قاله ايوة مش كلها عليها شعار الشركة قاله لازم تدفع قاله ياعم ادفع ايه دي هدايا
قاله يعني لازم تدفع المهم من هنا لهنا الراجل قاله هاحسبهملك ب1000 جنيه واتخيلوا دفع عليهم قد ايه أكثر من 300 جنيه مصري يعني 30 % علي الهدايا فعلا نــورت مــصــر

المهم عدي من الجمارك ودخلي علي بتاع أمن الدولة وأخد الجواز عشان يضربه علي الكمبيوتر وركنه عنده فراح سأله قريبي هو الجواز في حاجة فرد عليه بابتسامة نــورت مــصــر يا أستاذ محمود وثانية واحدة واديهولك وتكرر السؤال مرتين وتكررت نفس الابتسامة والرد مرتين ثم نادي بتاع أمن الدولة علي صول واداله الجواز وقاله خده برة وظبطه وقريبي سامعه بودنه وراح الصول بيقوله تعال برة يا أستاذ فقريبي قاله واطلع بره ليه هو انت عايز الجواز في حاجة قاله لا

قاله طب هاته وخده وقاله بعد اذنك وراح معدي وخرج وكل خطوتين يلاقي حد يقرب منه ويقوله حمد لله علي السلامة و نــورت مــصــروالكلمتين دول مش ببلاش من بتوع النضافة واي حد يقابله لغاية مخرج من المطار

وطلعنا نجيبه بالعربية من قدام صالة الوصول وركب وحطينا الشنطة في العربية ولقينا عسكري مرور بيشاور ويقول نــورت مــصــر وكلم حضرة الظابط ورحنا نكلم الظابط قالنا الرخص وطبعا اديناله الرخص وقال انزلوا ونزلنا وكان حواليه عدد من المصريين متجمعين- كلهم زينا نوروا مصر- وراح قايلنا حضرتك دلوقتي مخالف اقوله مخالف ازاي باخد واحد من قدام الصالة ابقي مخالف ولم أنتظر اكثر من دقيقة قالي ايوة المفروض ينزل بالاتوبيس وحضرتك تقابله تحت في مركن العربيات قلتله مفيش حاجة بتقول الكلام ده لا قدام الصالة ولا واحنا طالعين وبندفع الكارتة قالي لا في وعندكوا حل من ثلاثة يا اسحب رخصة العربية يا رخصة السائق يا تدفعوا غرامة 25 جنيه فرحنا دافعين وفجأة بالظابط يخرج من جيبه كبشة فلوس من كل نوع يا باتسطة ايش جنيهات وانصاص وارباع ولا بياعين الاسواق العشوائية ورحنا ماشييين و نــورت مــصــر

ليست هناك تعليقات: