تعلمت من رمضان 1428 – الجزء الأول

تقبل الله منا و منكم جميعا ... رمضان مدرسة ... السنة دي اتعلمت شوية حاجات جديدة ... حبيت أشارككو فيها – عسى الله أن ينفع بها

نبدأ...

التلفزيون

حاجة من حاجتين: يا تحدد وقت الفطار بس للفرجة – يا تلغي الفرجة من أساسه

دا طبعا باعتبار الآتي:

لو إنت مسلم بتحب ربنا و بتحب دينك تقوم:

1. لاغي كل القنوات التي كلها شر (زي قنوات الأغاني و قنوات الأفلام و قنوات المسلسلات و قنوات الدردشة و قنوات الموضة و قنوات الإباحية .... إلخ) – Delete
   
2. لاغي كل القنوات التي شرها أكثر من خيرها – Delete
   
3. لاغي كل القنوات اللي الهيافة فيها أكتر من الجد – Delete
   
4. لاغي كل القنوات اللي مش ممكن تستفيد منها إنت شخصيا (كل واحد و مزاجه: أنا مثلا لاغي قنوات بيع العقارات و قنوات السيارات ...) – Delete
   
5. عامل تصنيفة سهلة لكل نوع من أنواع القنوات الهادفة المتبقـية و ذلك لسرعة الوصول للقناة المطلوبة - Favorites
   

   مثال:     القنوات الإسلامية (طبعا السنـّيـّة بس!) تحطها في باقة
   

   و القنوات الإخبارية في باقة
   

   و القنوات الوثائقية و العلمية و الصحية في باقة
   

   ... إلخ
   

    طبعا الكلام دا المفروض يكون معمول في تلفزيون كل مسلم و طووووووووووووول السنة

ختم القرآن:

طبعا رمضان لازم يكون مختلف، يعني تتراوح قراءتك في اليوم الواحد من جزء واحد إلى عشرة أجزاء، الموضوع مش صعب، لأن الواحد أصلا المفروض إن أقل ورد له خارج رمضان يكون جزء يوميا، لو إنت تعبان زي حالاتي و مش زي الناس الجامدة (ربنا يقويهم و يثبتهم) ممكن نيجي في رمضان نعمل الآتي:

1. جزئين يوميا: في أول خمسة عشر يوم
   
2. ثلاثة أجزاء يوميا: في تاني عشر أيام
   
3. ست أجزاء يوميا: في آخر خمس أيام
   

   طبعا لو فيه اعتكاف كامل .... يبقى فيه كلام تاني!، و خلوا بالكو ... التدبر أهم من مجرد كثر القراءة؛ لأنه ينبغي للقارىء أن يكون شأنه الخشوع و التدبر و الخضوع، فهذا هو المقصود المطلوب، و به تنشرح الصدور و تستنير القلوب. فقد روي عن النبي صلى الله عليه وسلم أنه قام بآية يرددها حتى الصباح، وهي قوله:(إن تعذبهم فإنهم عبادك
   وإن تغفر لهم فإنك أنت
   العزيز الحكيم)
   

   و يستحب البكاء و التباكي لمن لا يقدر على البكاء، فإن البكاء عند القراءة صفة العارفين و شعار عباد الله الصالحين، قال الله تعالى: " و يخرون للأذقان يبكون و يزيدهم خشوعاً "
   

   قال إبراهيم الخواص: دواء القلب خمسة أشياء: قراءة القرآن بالتدبر، و خلاء البطن، و قيام الليل، و التضرع عند السحر، و مجالسة الصالحين
   

    و طبعا بعد رمضان ما تقللش عن جزء يوميا ... إوعى...

الإنترنت:

ما فيش إنترنت يا ريت لو سمحتوا في رمضان ... نهائي ... لأن مشكلته أفظع من التلفزيون ... بيسحب الوقت هوا ... احذروا الإنترنت عموما إلا في أضيق أضيق الحدود ... حتى لو حاجات عادية

(الحاجات الغلط مفروغ من أمرها طبعا ... ولا إيه؟؟!!)

الاعتكاف:

م الآخر كل الموظفين عندهم 21 يوم أجازة سنوية ... صح؟

لازم تاخد العشرة الأواخر دول أجازة، مش خسارة في الثواب الكبير و ف ليلة القدر

و بعدين دول هيكونوا على أقصى تقدير 8 أيام – فيه خميس و جمعة على الأقل في العشر أيام دول

و طبعا غني عن الذكر إن غير الموظفين أصحاب الأعمال الحرة أسهل في موضوع الأجازة

يا جدعان ... مش ممكن اللي احنا فيه دا ... دا بيقول لك:

من قام ليلة القدر إيماناً واحتساباً؛ غفر له ما تقدم من ذنبه...

تحروا ليلة القدر في الوتر من العشر الأواخر من رمضان...

كان النبي صلى الله عليه وسلم يعتكف العشر الأواخر من رمضان حتى توفاه الله...

...

يعني تيجي في الصيف و تاخد أجازة قد كدا ... و مستخسر 8 أيام يمكن تكون سبب في عتق رقبتك من النار ...أو سبب في استجابة دعواتك ؟؟؟!!!... تسوى إيه الدنيا؟؟؟!!!

دي حاجة..

الحاجة التانية: لازم تجهز نفسك كويس قبل الاعتكاف: ماديا و معنويا – عشان مايبقاش لك حجة تخرج أبدا

الحاجة التالتة: لازم تحرص على اغتنام كل الوقت المتاح في كل أنواع العبادات و الشعائر و الدعوة إلى الله و جهاد النفس .... بطل كتر نوم و كتر كلام مع صحابك و إوعى تكتر من الأكل

الحاجة الرابعة: استشعر أنس الخلوة مع الله – و حلاوة مناجاة الله – و عود نفسك على محاسبة نفسك و على إخلاص الدعاء

المهم ... الاعتكاف دا حاجة مهمة جدا (مش بس في رمضان) و أكيد حتغير مسيرة حياتك لو أخلصت... في الدنيا و الآخرة