حبة خزعبلات كدة....ع الماشي

الخزعبلة الأولي :

السنة البائدة 2007

انتهي عام وبدا معه الاعلام في حصاد الأرقام ومن هذه اليوم الذي أحزن المصريين في استفتاء برنامج العاشرة مساءا وكان هو يوم خسارة الاهلي في نهائي افريقيا واختفي غرق العبارة وغرقاه الذين تعد عددهم الالف وغرق الشباب علي السواحل الشرقية

ولا أجد تعليقا علي نتيجة الاستفتاء

الخزعبلة الثاينة

المطبات والشرم

تفاجأت حين شاهدت المؤتمر الصحفي للسيد الرئيس وهو يجيب عن سؤال عن الحجاج الفلسطينين ولقيت مرة واحدة بيكلم عن المطبات والرصف وطبعا الريس كان قصده عن المطب ابو 100 مليون دولار ومعلش يا جماعة الراجل مكلف عربيته ومش عايز يخسر وبمناسبة العربيات هل يعرف احدكم ان السيد الرئيس الذي يهتم بالفقراء والمساكين لديه في جراجه فوق المائة عربة مصفحة له وللحرس وتكلفة السيارة الواخدة فوق الثلاثة ملايين دولار أي ما يساوي ثلاثمائة مليون دولار وبالضرب في السعر الرسمي للدولار يبقي في جراج سيادته فوق المليار ونصف من الجنيهات كتكلفة ثابتة بالاضافة الي التكلفة الاضافية للصيانة والاصلاح واللي مقلوكوش بقي عليها ومثال عليها مساعدين السيارة تصل الي 64 الف دولار -يا بلاش- مش بقولكم الراجل بيراعي الفقراء والمساكين وسابلهم الدعم

الله عليك بس واضح ان المطب بتاع 100 مليون اللي اتخصموا من المعونة الامريكية نتيجة للاتهام بالتسيب علي حدودنا الشرقية جابت فايدة

رحم الله رجال الأمة لايرضون بالانكسار والمهانة ولو كان الثمن مليارات الدولارات وليس بضع مئات من الدولارات

الخزعبلة الثالثة

رأس الســـنة وأنــــــو

الواد ابن أختي الصغنون أنو-وللي ميعرفشي ده في أول حضانة KG1 - وكنت بكلمه في التليفون
وبيقلي: يا خالو احنا كان عندنا حفلة في المدرسة
وأقله: وعملت ايه يا أنو؟
راح قايلي : وبابا نويل جه وادانا هدايا.
اخوكو تنح: بابا ايه ياأنو يا حبيبي ؟!!!
راح قايل بكل تأكيد : بابا نويل يا خالو بس جه لوحده مش مع ماما نويل!!
رحت قلتله اديني أمك-في ناس فلاحس هيقولوا ايه أمك دي ، دي لفظ مش ولا بد مش تقول مامتك وطبعا الواحد من دول ميعرفشي ان النبي صلي الله عليه وسلم يقول أمك ثم أمك ثم ابوك ، اهمدوا بقي -
وقلت لأختي : ايه موضوع الزفت نوهيل ده؟
قالتلي : المدرسة هي اللي عملت الحفلة عشان راس السنة
قلتلها : لازم تفهميه ان بابا نوهيل ده مجرد هلاوس لان الله هو الرازق ويجب علينا ان نزرع ذلك في عقيدتهم وليس بتاع كوكاكولا لان اصلا بابا كوكا مكانش بيلبس احمر في بدايته الا ان اعلان لكوكا هو اللي جعله يلبس الاحمر
رجاء حافظوا علي عقائد أطفالنا من الهجص لان الأطفال غير المسلمين أو بالأحري المقيمين في البلاد الغربية يؤمنون ايمانا جازما بان هذا النويل حقيقي وموجود فربنا يرحمنا والمشكلة ان مدارسنا تزرع فيهم هذه الترهات