زيارة لبيت قطرة

زيارة لبيت قطرة السلام عليكم و رحمة الله و بركاته إزيكوا عاملين ايه تعرفوا لمّا تحبوا حاجه قوى و تهتموا بيها طول عمركوا و في نفس الوقت تخافوا تقربوا منها لمجرد انكوا فاهمين غلط او مش فاهمين خالص هو ده بالظبط كان حالى مع الأنسه قطرة ودي عبارة عن حاجه صغنطوته لونها احمر اسمها الثنائي :- قطرة دم و ساكنه في وريدي و فيها سر الحياة اول مرة خرجت فيها للنور و اتولدت امام عيني كان مع اول كيس دم اتبرع بيه في حياتي كنت سعيده بيها و كانت سعيده بيّا شدة حبى ليها خليتني اسعي وراها و اسأل عليها و كل ما كنت اعرف عنها اكتر كل ما كان يزيد حبى ليها عشان كده اسمحوا لنا ندعوكم دعوة متواضعه ( 14 طفل من جمعية صحبة الخير و فريق عمل جروب المنار ) انكم تشاركونا زيارتنا لبيت من بيوت قطرة عشان نسمع اكتر عنها ونفهم اكتر عن عمق دورها في الحياة و اهمية دورنا احنا في التبرع بالدم لمّا نسمع الدكاترة و همّ بيكلمونا عنها و بيفهمونا يعني ايه تبرّع بالدم و يفرجونا على دورة حياتها في المعامل من اول ما بتخرج للنور من الناس اللى قلوبها بيضا لغاية ما بتوصل لقلوب املها كبير في ربنا البيت ده يبقى المركز القومي لنقل الدم - هيئة المصل و اللقاح - بشارع البطل احمد عبد العزيز بالدقي هو طبعاً جميل اننا نتبرع على طول مفيش وقت لإننا نفهم عشان ملايين المرضي المنتظرين بس صدقوني و على ضمانتى لمّا بنفهم كمان بيكون الأمر اروع موعد الزيارة لو حبيتوا يوم السبت القادم ان شاء الله الموافق 24/1/2009 الساعه 10 صباحاً و التجمع امام باب المركز عشان اللى عايز يتبرع و اللى عايز يفهم اه صحيح في مفاجأة كمان و هي ان الـ 14 طفل المشتركين معانا في الزيارة دي و اللى بيوجهوا لكوا الدعوه للزيارة و اللى جايين عشان يعرفوا يعني ايه تبرع بالدم عشان بعد 4 او 5 سنيين ان شاء الله لمّا يكبروا يتبرعوا همّ كمان بالدم الأطفال دول جايين من ابناء الأسر التى تكفلها الجمعيات يعني اللى بيسموهم في الجمعيات الخيريه ايتام و مرضي و مستحقين شوفتوا الروعه للإستفسار الإتصال على 0122938551 شكراً منار عقل