السبت، سبتمبر 06، 2008

السبت القادم 4 خير × 1 يوم

السلام عليكم و رحمة الله و بركاته

حضرتك تحب تعمل 4 خير × 1 يوم

افطار صائم

+

رحله مع الأطفال الأيتام في المراجيح و الحديقه

+

عمل شنط ( كوبونات رمضان ) و

أخيراً

التبرّع بالدم للأطفال

مرضي اللوكيميا ( سرطان الدم ) و مرضي السلاسيميا ( انيميا البحر المتوسط ) بمستشفيات الدمرداش + مستشفى 5757

على فكرة اليوم ده حيكون مثالى جداً للى عايز يعمل دايت

كان هذا الموجز و الى حضراتكم الأنباء بالتفصيل

تحدث مسئول رسمي عن مجموعة المنار الخيريه ( هندسة عين شمس ) انه قد تقرر من قبل اعضاء المجموعه القيام برحله شيقه و مجنونه عبر الة الزمن الى عالم الخير

و اوضح ان هذه الرحله ستبدأ ان شاء الله في تمام الساعه الرابعه من عصر يوم السبت القادم الموافق 13/9/2008

و اوضح المسؤل ان هذه الرحله مقامه على شرف 200 اسرة من عالم الخير و هم اصحاب القلوب البيضاء الذين اختبر الله قوة ايمانهم و صبرهم و اللى حيشرفونا من الأماكن التاليه

جمعية رعاية المكفوفين بعابدين

الأطفال الأيتام حفظة كتاب الله من جمعية الأسرة المسلمه

اسر محو الأميه و الطلبه المغتربين من جمعية المقسطين

اسر الأرامل التى تربي ايتام و مرضي و معاقين

التى تكفلها شهرياً و تتابعها بالعلاج و العمليات الجراحيه مجموعتكم المنار

و دول حيشرفونا من مناطق سكنيه متفرقه بين ( القليوبيه + الأميريه + عزبة النخل + مدينة نصر )و

موقع الإنطلاق للرحله الفضائيه دي حيكون من كافتريا فتافيت السكر داخل حديقة الطفل بمكرم عبيد بمدينة نصر

اول محطه حتكون حفلة افطار ذاتى بالكافتريا

و بعد الإفطار ان شاء الله حينقسم المتبرعين بمجهودهم لنصفين

نصف حيرافق الأطفال في رحله المراجيح و اللعب داخل الحديقه ... هييييييه يا بخت المتطوعين دول حيلعبوا

النصف الآخر ... لهواة التسوق ... ههههه و فيه سينتقل المتطوعين برفقة السيدات امهات الأطفال و مشرفات الجمعيات

الى سوبرماركت بمدينة نصر ايضاً قريب من الحديقه

لمساعدتهم في صرف كوبوناتهم الرمضانيه و التى هي بإختصار شنطهم الرمضانيه بس الفرق اننا حنساعدهم يختاروها على ذوقهم و بإحتياجاتهم

و بعد الإنتهاء ان شاء الله سننطلق ( اللى يحب من حضارتكم يعني ) الى مستشفي 5757 او مستشفى الدمرداش للتبرع بالدم هناك

الحقيقه حاولنا نجيب عربية التبرع بالدم عند الحديقه لكن لغاية دلوقتي متوصلناش لإتفاق

و للأمانه بالنسبة للتبرع بالدم بالذات احنا اخترنا المكانين دول لأنهم بيشتكوا من نقص في اكياس الدم للعديد من الحالات في هذه الأيام

و زميلتنا الأنسه رحاب الطحان كانت عايزانا ننطلق في زيارة منفصله تحت اشرافها للتبرع بالدم مع اعضاء مجموعتها نهر الحياة في يوم منفصل لمستشفى 5757

و بعدين قلت لها بما ان مفيش متبرعين و لا تبرعات تقريباً

ياللا بينا نضمهم على بعض و نعمل 4 عمل خير × يوم واحد

و تفضلت مشكورة بقبول الدعوة و الموافقه على الإندماج

يا ريت تشرفونا في رحلتنا المجنونه دي

اللى بنعملها بقالنا 3 سنين طالعين الفضاء الخيري و نازلين من الفضاء الخيري كل رمضان مبسوطين و مزأططين بشهاده كل اللى جمّ السنوات اللى فاتت و منتظرينها على احر من جمر السنه دي كمان ان شاء الله

و حضرتك لسه مش معانا ... تعالى بقى

آه .... يا خبرررررررررررررر.........نسيييييييييت

كنت حقفل الرسالة و اقول لكم تصبحوا على خير من غير ما اقول لكم اهم حاجه

بالنسبة للتبرعات عشان اليوم يتم ان شاء الله

محتاجين طبعاً متبرعين بالجهد

و يا ريت متخصصين رياض الأطفال و علم النفس و الإجتماع يشرفونا في اليوم ده عشان انا مش بحب يبقى وجودنا مع الأمهات و الأطفال مجرد وجود مادي و لكنى اطمع في وجود معنوي روحاني يتم تذويدهم فيه ببعض القيم الجميله التى نجتهد في توصيلها و لكن زي ما بيقولوا

ادى العيش لخبازه

و يا ريت متبرعين بالإنتقالات

متخافوش مش حنأجر صواريخ للإنتقال لفضاء الخير

بس احنا يا دوووووب بس حنأجر ميكروباصات صغنطوطه لنقل الاسر من و الى جمعياتهم و من و الى الحديقه و السوبر ماركت و لنقل حضراتكم من و الى المستشفى للتبرع بالدم

و يا ريت متبرعين بالوجبات

على فكرة مش مشترط صنف معين و لا كميه معينه الصنف اللى تحبوا تيجيبوه هاتوه في ايديكم و انتوا جايين بس متنسوش تبلغوني

يعني ( صنية بطاطس مسبكه ... حلة ارز بالشعريه ... زجاجة عصير ... فرخه مشويه ... سمبوسه ... كفته .....مجدوس ....محشي ....رقاق ... كبيبه ... كبسه ... صنية كنافه ... اى حاجه و كل حاجه تحبوا و تعرفوا تطبخوها ... ان شالله حتى سندويتشات فول و طعميه ) احنا بنقول

عزومة افطار

عايزين نشوف تفانينكم في الطبيخ ..و نخرج الهوايات المكبوته للمودمزيلات في فن الطبيخ

لأ بجد و من غير هزار بنحلم نعمل سفرة متنوعه و شيك بكميات مش كبيرة و بسيطه و كل واحد يختار طبقه بآدميه من الأصناف اللى حيحبها حاجه كده زي البوفيه المفتوح

احنا عايزين نسعد ضيوف الرحمن اصحاب القلوب البيضاء اللى ربنا حيركمنا بخدمتهم اليوم ده و نحسسهم اننا بنعزمهم في بيتنا بالضبط زي اى ضيوف غاليين علينا لأ و اغلى من اغلى ضيوف علينا

اتصلوا بينا لتوضيح نوع مشاركتكم اللى تحبوا تشاركو بيها ولإضافة مقترحاتكم بشان اليوم و تأكيد مجيئكم ان شاء الله

على تليفونات الجمعيه

24721722

او

0122938551

فريق عمل المجموعه مع حفظ جميع الألقاب :- ( هاني - ايمن - فهد - باسل - محمد - عبد العزيز- احمد - ضياء - هيثم - اسلام - مديحه - احلام - عبير- ساميه رحاب - سمر- حنان - شيماء - هند - هاله - امانى - هبه - دينا - ايمان - هاجر - هدير- نجلاء - مها - منال -نرمين- نيفين - فاطمه - سلوي - منار ) و

بيتهيألى كفايه عليكم كده دوشتكم ما فيه الكفايه و لو بتقروا الرسالة في الصيام يبقى زمانى جوعتكم

اشوفكم على خير يومها ان شاء الله

اللهم اجعلنى خيراً مما يظنون و اغفر لى ما لا يعلمون و ارحمني يوم يبعثون


ليست هناك تعليقات: