السلام عليكم و رحمة الله و بركاته
انا عارفه ان بعض الناس بتتضايق من استخدامي لكلمة
موضه
في مثل تلك المواضيع
لأنهم بيعتقدوا انى بسخر من التوجهات الصادقه و الجهود المبذوله تجاه القضايا الراهنه
لذلك اعتذر مقدماً
و احب اوضح للساده القراّء انى لمّا قلت في يوم من الأيام الموضه السنه دي غزه او الموضه اليومين دول لبنان
او لمّا بقول دلوقتي ان الموضه اليومين دول الدويقه
بيكون كل املى و حلمى المتواضع ان بعد اى موضوع بيحصل و بيشد اهتمامنا كلنا لفترة من الزمن
و بعدين نبتدي نفقد الأمل
او نمل او ننسي او تلهينا الحياة
بحلم يفضل بيننا ناس فوق العاده ناس مبتنساش و مبيهداش ليها بال و لا بترتاح اللا لمّا بتتحل المشكله بجد
يمكن بحلم حلم مستحيل انه تتحل المشكله
اى مشكله بجد
عشان كده يا ريت كل الناس اللى بتبعت دواء او بطاطين او اكل او فلوس لمنكوبي الدويقه يدوروا على بعض و يتعاونوا مع بعض عشان يحطوا ايديهم على المشكله الحقيقيه
مشكلة السكن
صحيح الدوله بتسكنهم في شقق بس اكيد مش كلهم حتتوفر لهم شقق و اذا حتى غطت العدد كله من اصحاب البيوت اللى انهارت مع انهيار الصخور
فهناك الألاف الذين لم تنهار منازلهم بعد و يسكنون هناك في العشش العشوائيه ( احياء كالأموات ) منتظرين ان ياتى عليهم الدور و تتكرر الكارثه
فتحسم قضيتهم للأبد
يا امّا يموتوا يا امّا يكون في امل يعيشوا بجد
عشان كده ارجوكم نساعدهم
يعيشوا بجد ، يسكنوا بجد ، يلبسوا بجد ، يتعلموا بجد ، يتعالجوا بجد
مش بس في منطقة الدويقه لكن في الف دويقه موجوده في الف مكان تانيين
اسطبل عنتر ، الموسكي ، ابو رجيله ، القليوبيه ... و غيرهم و غيرهم كتير
متقولش و انا مالى انا حعمل ايه لوحدي اديني بعمل اللى ربنا يقدرني عليه على اد فلوس و وقتي الحلم ده فوق طاقتي
لو حطيت حلمك على احلام الباقيين حنقدرنحقق لهم احلام بجد
جزاكم الله خيراً
منار عقل
المشاركات
ليست هناك تعليقات:
إرسال تعليق